Վիրջինիան բնական քաղցրությամբ օժտված ծխախոտի տեսակ է, որը հայտնի է իր մեղմ, փափուկ ծխով և ոսկեդեղինից մինչև բաց նարնջագույն երանգներով։ Այն ունի բնական շաքարի համեմատաբար բարձր պարունակություն, ինչի շնորհիվ առանձնանում է թեթև, փոքր-ինչ քաղցր համով և նուրբ թթվաշությամբ։ Վիրջինիան աշխարհում ամենատարածված ծխախոտի տեսակներից է։ Այն լայնորեն կիրառվում է գլանակման թութունի խառնուրդներում և սիգարետներում՝ ինչպես առանձին, այնպես էլ Բերլի և Արևելյան ծխախոտների հետ համադրությամբ։
Բերլի ծխախոտի տեսակը հայտնի է իր հողային, ընկուզային համային նոտաներով և բնական շաքարի ցածր պարունակությամբ։ Այս ծխախոտի տերևները սովորաբար ունեն բացից մինչև մուգ շագանակագույն երանգներ։ Բերլի ծխախոտը հիմնականում չորացվում է օդային չորացման եղանակով, որի ընթացքում տերևներն ձեռք բերում հարուստ, փոքր-ինչ փայտային բույր և հետհամային նոտաներ։ Բերլի ծխախոտն ունի համեմատաբար չեզոք համային բնույթ, ինչի շնորհիվ լավ է կլանում ավելացված բուրավետիչներն ու համային հավելումները։ Այն լայնորեն կիրառվում է գլանակելու թութունի, սիգարետների և ծխամորճի թութունի խառնուրդներում՝ հաղորդելով դրանց ծանրություն, խորություն և արտահայտված ծխախոտային համ։
Արևելյան (Անվանում են նաև Օրիենտալ) ծխախոտի տեսակը հայտնի է իր փոքր տերևներով, արտահայտված բուրավետությամբ, բնական կծվությամբ ու թեթև քաղցրությամբ օժտված համով։ Այն հիմնականում աճեցվում է Արևելյան Միջերկրականի ավազանում և հարակից շրջաններում, որտեղ տեղական կլիման և աճեցման պայմանները նպաստում են դրա հարուստ բույրի ձևավորմանը։ Արևելյան ծխախոտը սովորաբար չորացվում է արևային չորացման եղանակով, ինչը նպաստում է դրա բնորոշ բույրի և համային հատկությունների պահպանմանը։ Այն լայնորեն կիրառվում է թութունի խառնուրդներում՝ հաղորդելով դրանց բույրի բազմազանություն, նուրբ կծվություն և յուրահատուկ համ։
Քենթուքի ծխախոտն առանձնանում է իր հարուստ համով՝ փայտային և հողային նոտաներով։ Այն հիմնականում չորացվում է կրակով չորացման եղանակով, որի ընթացքում փայտի վերահսկվող այրումից առաջացող ջերմությունն ու ծուխը տերևներին հաղորդում են բնորոշ, արտահայտված ծխային բույր և խորը համ։ Քենթուքի ծխախոտը լայնորեն կիրառվում է ծխամորճի թութունի, ծամելու թութունի և գլանակման թութունի որոշ խառնուրդներում։
Օդային չորացուման ընթացքում թարմ հավաքված ծխախոտի տերևները կախում են լավ օդափոխվող ամբարներում և մի քանի շաբաթ թողնում, որպեսզի օդի բնական շրջանառության շնորհիվ տերևները աստիճանաբար չորանան։ Օդային եղանակով չորացված ծխախոտը սովորաբար ունենում է բնական շաքարի ցածր պարունակություն և առանձնանում է հողային, փայտային, երբեմն նաև ընկուզային համային նոտաներով։ Այս եղանակը հիմնականում կիրառվում է Բերլի ծխախոտի և սիգարների արտադրության մեջ օգտագործվող ծխախոտի որոշ տեսակների չորացման համար։ Վերջնական համն ու գույնը կախված են ծխախոտի տեսակից և չորացման պայմաններից։
Ջերմային չորացման ընթացքում թարմ հավաքված ծխախոտի տերևները կախում են ջերմատար խողովակներով տաքացվող ամբարներում, որտեղ 5–7 օրվա ընթացքում ջերմաստիճանը փուլ առ փուլ բարձրացվում է՝ մոտ 35°C-ից մինչև 75°C։ Այս եղանակը թույլ է տալիս չորացնել տերևներն առանց ծխի հետ անմիջական շփման՝ պահպանելով դրանց բնական շաքարը և ձևավորելով ոսկեդեղինից մինչև նարնջագույն երանգներ։ Այս եղանակը հիմնականում կիրառվում է Վիրջինյան ծխախոտի համար՝ նպաստելով դրա մեղմ բույրի և բնական քաղցր, փափուկ համի ձևավորմանը։ Այն լայնորեն օգտագործվում է սիգարետների և գլանակման թութունի խառնուրդներում։
Արևային չորացման ընթացքում թարմ հավաքված ծխախոտի տերևները չորացվում են արևի ուղիղ ճառագայթների և բնական օդի շրջանառության պայմաններում։ Տերևները փռում կամ կախում են հատուկ հարմարանքների վրա, որտեղ արևի ուղիղ ճառագայթների ազդեցությամբ աստիճանաբար չորանում են՝ ձեռք բերելով իրենց բնորոշ գույնը, բույրն ու համը։ Այս եղանակով չորացված ծխախոտն առանձնանում է թեթև, բուրավետ համով՝ համեմունքային, խոտաբույսային և երբեմն թեթև քաղցր նոտաներով։ Արևային չորացումը հիմնականում կիրառվում է Արևելյան ծխախոտի տեսակների համար։ Վերջնական համն ու բույրը կախված են կլիմայից, ծխախոտի տեսակից և արևի ազդեցության տևողությունից։
Կրակով չորացման ընթացքում հավաքված ծխախոտի տերևները չորացվում են փակ ամբարներում՝ փայտի վերահսկվող այրումից առաջացող ջերմության և ծխի ազդեցությամբ։ Չորացումը կարող է տևել մի քանի օրից մինչև մի քանի շաբաթ՝ կախված ծխախոտի տեսակից և ցանկալի արդյունքից։ Այս եղանակով չորացված ծխախոտն առանձնանում է արտահայտված ծխային, հողային և փայտային համային նոտաներով։ Այն լայնորեն կիրառվում է գլանակման թութունի և ծխամորճի թութունի խառնուրդներում՝ հաղորդելով դրանց բնորոշ ծխային բույր և հարուստ համ։